الاخوان وأبو الفتوح والملوخية

خلوني أحكيلكوا قصة سريعة.

كان في نكتة بتقول كان في واحد بيحب الملوخية رجع البيت يوم السبت سأل أمه طابخة إيه، قالت ملوخية فقال هيييه ملوخية ملوخية. رجع يوم الحد لقاها عاملة ملوخية قال هيه ملوخية ملوخية. يوم الاتنين برضو قال ماشي ملوخية ملوخية. يوم التلات برضو نفس الكلام قال يا ديني ملوخية ملوخية. الأربع شرحه قال مش ممكن كدة ملوخية ملوخية. يوم الخميس والجمعة نفس الكلام لحد ما يوم الجمعة كان بيقول مش قااادر ملوخية ملوخية. يوم السبت بقى رجع البيت لقى أمه طابخة ملوخية قال هيييييه ملوخية ملوخية. الهدف من النكتة إن ده بالظبط اللي حصل مع الاخوان.

نزلوا معانا في الثورة قولنا هييه ملوخية ملوخية والدقن والبيكيني أيد واحدة. باعونا في أول ملف قولنا ماشي ملوخية. تاني بيعة في تالت بيعة في رابع بيعة لحد ما كفرنا بالملوخية وما بقناش طايقين اخوان. لحد ما جالنا عبد المنعم أبو الفتوح، راجل متربي في رحم الجماعة وراضع منها، فقولنا كلنا هيييييه ملوخية ملوخية.

نشكركم على حسن استماعكم