توضيح: الشهادة اتنشرت, بنحاول نعيد نشرها من أكبر عدد ممكن عشان ماحدش يتاخد بسبب كسر حظر النشر

طبقا للرابط ده اول من خرق حظر النشر كان التليفزيون المصري و تعمد الكذب

http://www.25jan-news.com/article.php?id=4799

لو مهتم تشيل معانا جزء من المسؤولية اعد نشر الشهادة باسمك (يعني اعمل كوبي بيست للشهادة في نوت جديدة باسمك), او اكتفي بقرائتها

 

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟

ج1 : الاجتماع كان برئاسة رئيس الوزراء واعتقد أننه بلغ

س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟

ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد

الرئيس ؟
س3: ما الذي أبداه رئيس الجمهورية في هذه اللقاءءات ؟

ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها يتبع   

ج٣-2: كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة يتبع    

ج٣-3: القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة – يتبع

ج٣-4 : أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ يتبع

س٤-2: استعمال قوات الشرطة القوة ضد المتزاهرين بما فيها استخدام الاسلحة الخرطوش والنارية من 25 يناير حتي 28 يناير ؟ 

ج4 : ليس لدي معلومات عن هذا واعتقد ان هذا لم يحدث

س5: هل ترك رئيس الجمهورية السابق للمتهمين المذكورين من أساليب لمواجهة الموقف ؟

ج5 : ليس لدي معلومات

س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟

ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران
س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟

ج7 : ليس لدي معلومات

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟

ج8: إنا معنديش معلومات بكده.. الاحتمالات كتير لكن مفيش معلومة عندي

س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟

ج9 : إنا معرفش ايه اللي حصل

س10 : هل تستطيع سيادتك تحديد هل كانت هناك عناصر أخري تدخلت ؟

ج10 : هيا معلومات غير مؤكدة بس اعتقد ان هناك عناصر تدخلت

س11 : وما هي تلك العناصر ؟

ج11 : ممكن تكون عناصر خارجة عن القانون

س12 : هل ورد لمعلومات سيادتك ان هناك عناصر اجنبية قد تدخلت ؟

ج12 : ليس لدي معلومات مؤكدة ولكن ده احتمال موجود

س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر

أو تكليفات في كيفية التعامل ؟

ج13 : رئيس الجمهورية ممكن يكون أصدر أوامر – طبعا من حقه ولكن كل شئ له تقييده المسبق وكل واحد عارف مهامه

س14 : ولمن يصدر رئيس الجمهورية علي وجه العموم هذه الأوامر ؟

ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

س15 : وهل يجب قطعا علي من تلقي أمر تنفيذه مهما كانت العواقب ؟

ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا

ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟

ج17: يسأل في ذلك مساعديه الذين ابلغوه هل هو علي علم أم لا

س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟

ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات

س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟

ج19 : هذه مسئولية جهات التحقيق

س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات – يتبع

س٢٠-2 : دون العرض علي رئيس الجمهورية؟

ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه – يتبع

ج٢٠-2 : ولكن التظاهر وفضه هي خطة وتدريب موجود في وزارة الداخلية

س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة –  يتبع

س٢١-2 : وذلك من منظور ما وصل لعلم سيادتك ؟

ج 21 : معنديش علم بذلك

س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام السيارت لدهس -يتبع

س22-2 : سيارات لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟

ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة يتبع

س23-2 : بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

س24 : هل هناك اصابات أو وفيات لضباط الجيش ؟

ج 24 : نعم هناك شهداء

س25 : هل تعاون وزير الداخلية مع القوات المسلحة لتأمين المظاهرات ؟

ج 25 : لأ

س26 : هل أبلغت بفقد ذخائر خاصة بالقوات المسلحة؟

ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة

س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟

ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات

س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟

ج28: لا ..لم يتم القاء القبض على أى أحد

س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟

ج29 : لم يحدث

س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟

ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب

الجزء الاول: التعليق متروك للقارئ على الاخبار التالية:

الدستور:  من أولها..ضابط الأمن الوطنى بشبرا هشم سيارة الصحفى وهرب! (تفاصيل الخبر)

المصري إليوم:  تأجيل محاكمة قيادات أمن الدقهلية في «قتل المتظاهرين» إلى 12 يونيو وإخلاء سبيلهم (تفاصيل الخبر)

التدوينة دي مش عن الفروق بين نظام الدولة الرئاسي أو البرلماني لأ، التدوينة دي عن مفهوم الديمقراطية اللي بعض الناس بيحاولوا يفصلوه على مقاسهم ولا على هواهم. كل واحد ماسك الديمقراطية بيأيفها واللي مركبلها سوستة واللي عاملها عروة يمين وعروة شمال. عايزينها ديمقراطية برطمانية، كل واحد يحط رأيه في برطمان ويقفل عليه. ديمقراطية ماشية بمدأ وشك في الحيط وقفاك ليا. ديمقراطية بوسوا بعض والعبوا إخوات.

يا أعزائي الديمقراطية لها أنياب. الديمقراطية يعني المواجهة. الديمقراطية يعني بالرغم من تقبلي لرأيك المخالف وعدم حجري عليه، لا يعني ذلك إن مليش الحق اعترض عليه بقوة وأهاجمه كمان حتى لو بطريقة شديدة اللهجة. الديمقراطية يعني ادعو وأروج لفكري ورأيي زي ما أنا عايز. الديمقراطية يعني لو رأيك مش عاجبني وشايفه مش عاجبني أقول عليه غلط طالما لم اتعدى على حقوقك. الديمقراطية لا تعني إن رأيي المختلف عن رأيك هو محل نقاش فقط مع من يتفق معايا. الديمقراطية يعني حتى لو مش مقتنع برأيك ولا ليا دخل في الموضوع حتى، من حقي أناقشه و اعترض عليه. الديمقراطية فيها شراسة، نقاش، خلاف، إعتراض، دعوة، إقناع، ومشاركة. الادب والاخلاق واللطافة واللذاذة  مش شرط من شروط الديمقراطية. والأكيد هو إن عدم الدعوة لفكر معين وعدم محاولة إقناع الغير دي أفكار تتنافى من  الأساس مع الديمقراطية أصلاً يعني.

هتقولي إيه الهبل ده دي تبقى فوضى ومجتمع بربري لو مفيش قيود. لا يا عزيزي في قيود والقيود دي هي القانون وحقوق الإنسان والمبادئ  الادمية. غير كدة يا صديقي كل شئ مباح، ولو مش مصدق روح إسأل في الدول الديمقراطية اللي نفسنا نبقى زيها.

[رجاء قرائة التدوينة دي كمان: هي دي بقى الديمقراطية؟]

الثورة المضادة – حقيقة كل المصريين مؤمنين بيها من عصام شرف رئيس الوزراء لزيزو بتاع الكشك اللي بيبيع سجاير فرط. الكل حاسس إن بالفعل فيه ثورة مضادة ومحاولات شرسة للإلتفاف على الثورة وإحباطها أو إحباط ما يمكن احباطه. كلنا عمالين نلطم ونلعن الزمن الاغبر اللي رمى علينا فلول النظام وعمالين نولول ونقول مين يلحقنا. بس إن جيت للحق، أهم وأقوى أسباب قوة الثورة المضادة هي الثوار – أيوة الثوار. احنا اللي عمالين نتعاطى حبوب ثورة مضادة واحنا مش واخدين بالنا وبناخذها برشام ولبوس كمان.  وأرجوك اديني فرصة أشرحلك وجهة نظري قبل متقول عليا خاين ومبيت في مصطفى محمود.

مبدئياً لمن لا يعرفني شخصياً، أنا من يوم 25 يناير حتى هذه اللحظة مع الثوار قلباً وقالباً ومؤمن إيمان مافيهوش ذرة شك في الشعب وقدرته على الوصول لبر الأمان. لاكن عندي بعض الملاحظات اللي أحب أقولها ورزقي على الله لعل يكون فيها كلام  يفيد الثورة والثوار.

أنا في تقديري الشخصي في بعض الحاجات حصلت في جبهة الثوار تساعد الشباب الحلوين بتوع الثورة المضادة وبتخليهم يعرفوا يركبونا. والكلام ده برضو ينطبق على أي مشاكل تانية بتواجهنا ومش عارفين نواجها بأعداد جماهرية محترمة. إيه هي الاسباب:

• إنتقال الثورة من الشارع على فيسبوك بعد ما صدقنا نقلناها من فيسبوك للشارع: أنا لا أعني بالضرورة إعتصام عشرات الألاف في التحرير، بس اللي أقصده إن فعلاً كل شئ بقى على فيسبوك. من بيانات المجلس الاعلى للقوات المسلحة، لصفحة مجلس الوزراء، للهيئة المسؤولة عن الإستفتاء. الموضوع كله بقى بيخاطب شريحة صغيرة جداً من المجتمع مما فيه تهميش كبير لدور رجل الشارع اللي كان السبب الرئيسي في نجاح الثورة. العتاب هنا على بعض الثوار والإئتلافات وغيرهم انهم تقبلوا الموضوع ده ولم يأخذوا في الحسبان البقال ولا بتاع الجرايد اللي مش قاعد معانا على فيسبوك وتويتر. وأعتقد ده واضح جداً دلوقتي في الكلام على الإستفتاء.
• النشطاء وبعض الثوار قاعدين بيكلموا ويناقشوا في بعض و سايبين باقي الشعب: كأننا نسينا إن ما انجح الثورة هو النزول للشارع و توصيل الفكرة لرجل الشارع لخلق حركة شعبية حقيقية (grassroots movement). طول ما احنا مش بنتكلم مع عامة الشعب عمرك ما هتحصل على التأييد الجماهيري اللي إنت طالبه، خصوصاً إن الإجماع على المطالب هيقل مطلب ورا التاني. قاعدين احنا بس بنناقش في بعض وننقسم على نفسنا، وده السبب إن الأعداد عمالة تقل مع الوقت، والإعلام الرسمي ما يسعفش ومالوش أي دور بيصب في مصلحة الثورة بتاتاً.
• أخطاء ائتلاف شباب الثورة وإتحاد شباب الثورة وصفحة كلنا خالد سعيد: خلوني امسكهم واحدة واحدة. أولاً ائتلاف شباب الثورة: ائتلاف شباب الثورة اللي بيضم شباب من حركات سياسية مختلفة واسعة هو كان في الفترة الاخيرة شبه المتحدث الرسمي للثورة – بس للأمانة هم لم يجزموا في أي وقت انهم يعبروا عن كل الناس، بس للاسف تم اعطائهم هذا الدور. يعني مثلاً إجتمع الائتلاف مع المجلس العسكري أكثر من مرة لمناقشة مطالب الثورة، وكان الإعلام في كثير من المرات بيأخذ بياناتهم كبيانات رسمية للثورة، ودعوتهم لمظاهرة أو إعتصام كالدعوة الرسمية للثوار. مشكلتي مع الائتلاف هو مواقفهم الضعيفة في كثير من الأوقات التي لا تتناسب مع المسؤلية اللي عليهم. يعني مثلاً عجبني موقفهم من إقالة حكومة شفيق، لاكن مش عاجبني موقفهم من حل أمن الدولة. في يوم 4 مارس نزلوا بيان بيقول [لينك للبيان] “مطلب حل جهاز مباحث امن الدولة وليس تجميده أو إعادة هيكلته هو مطلب غير وارد التراجع عنه” ومع ذلك بقالنا أهو أكتر من إسبوع ومفيش موقف حازم بالرغم من عدم وجود نية من الحكومة أو المجلس العسكي بحل الجهاز.
  ثانياً إتحاد شباب الثورة: انتوا مين أصلاً؟ أكتر ما استفزني هو تصريحهم اللي نزل على مصراوي وبعدين رجعوا كذبوه على الاهرام إنهم بيطلبوا الجيش بإعتقال أي حد يعتصم بعد إنتهاء مظاهرة الجمعة اللي فات. الفكرة هم كذبوا فقط حتة الإعتقال و قالوا انهم يرفضوا العنف، لاكن ما كذبوش حتة انهم قالوا المظاهرة تبقى 12 ساعة بس ومفيش إعتصام. اختلفنا أو اتفقنا على جدوى الإعتصام، بس مفيش حد وصي على الثورة ولا الثوار ويقولهم ما يعتصموش. مفيش توافق على فكرة الإعتصام يبقى لا تدعو للإعتصام، لاكن برضو لا تدعوا لعكسه.
  ثالثاً بالنسبة لصفحة خالد سعيد – وهي صفحة مؤثرة جداً جداً جداً، ما يحزني هو موقفهم الضعيف في مطالب كتير وخلق إحساس على الصفحة إن الدنيا حلوة جميلة لطيفة وإن الثورة في الأمان وفي السليم، مما يجعل من يطالب بإستمرار جدية الثورة يبان إنه “مزودها”.
  اتمنى منهم كلهم يقدروا المسؤلية الملقاه عليهم، و عدم التسليم والثقة العمياء، وإنهم يخلقوا حالة من الحذر تطبيقاً لمبدأ حرس ولا تخونش عشان نتأكد من تحقيق كافة المطالب و الشعب يفضل الرقيب على ثورته. لازم يبقى في مواقف جريئة وحازمة وخصوصاً إن في طرق للتصعيد لا بتضر بالبلد ولا حاجة زي مثلاً مظاهرات الجمعة.

في ختام الكلام اللي عايز أقوله، إن المظاهرات والإعتصامات هي شئ رمزي. يعني مش بطول المظاهرة ولا بطول الإعتصام بس قد ما هي بالأعداد المشاركة لإن كل ما العدد زاد ده بيبين إن في رغبة حقيقية لا تساوم معها في تحقيق مطلب معين. لازم نركز على حاجتين عشان دول هيسهلوا علينا الخطوات اللي بعد كدة: أولاً نرجع ندعو للثورة كالدعوة لدين جديد (على رأي عمر طاهر) على الأرض مش على النت. ثانياً تحرير الإعلام في أسرع وقت ممكن عشان يبقى الإعلام إعلام ثوري مش إعلام بتاع تلحيس وتلزيق ويبقى بيعبر فعلاً عن الثورة ومطالبها.

أسيبكوا دلوقتي بقى يدوبك أقوم آخد حباية المضاد الثوري.

قبل ما أبدأ الكلام، أرجو قرائة التدوينة الأولى عن التعديلات الدستورية هنا.

بعيداً عن كلام الشعارات – اللي أنا مؤمن إيمان كامل بيه – زي لا لترقيع دستور سقط شرعيته، أنا عايز أقول بإختصار الاسباب الواقعية اللي تمنعني أنا شخصياً من قبول التعديلات، وأجزم إن كثير من أمثالي من الشباب وغيرهم قد يتفقون معايا على هذه الاسباب.

أولاً:  بالرغم من الاختلاف على تفسير المادة 189 مكرر، من ناحية الزامها للرئيس و المجالس المنتخبة بتشكيل دستور جديد من عدمه، أنا ما زال عندي قلق من المادة دي حتى في حالة الزامها بتشكيل دستور جديد. المادة نصها بيقول:

يجتمع الأعضاء غير المعينين لأول مجلسي شعب وشورى تاليين لإعلان نتيجة الاستفتاء على تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة أشهر من انتخابهم، وذلك كله وفقًا لأحكام الفقرة الأخيرة من المادة ١٨٩.

هذا معناه إن الفترة قبل تشكيل دستور جديد قد تمتد ل-٦ شهور أو أكثر، وفي خلال هذه الفترة، هيبقى بيحكمنا رئيس -  طبقاً للدستور القديم – لديه صلاحيات الألهة، وأنا مهما كان الرئيس المنتخب محترم و نزيه، ضميري يمنعني من الثقة العمياء في أي شخص أي كان إذا أعطى هذا الكم الهائل من الصلاحيات، اللي تمكن أي شخص خبيث من التلاعب بكل وأي شئ.

ثانياً: مناقشة وشرح التعديلات لم تأخذ حيز كافي من المناقشة في الاعلام الرسمي، ولا تم الدعاية والترويج للإستفتاء في الاعلام الرسمي بالقدر الكافي على الإطلاق، وإقتصر كلاهما على الاعلام المستقل والفيسبوك. فمن الاخر الاستفتاء ده يخاطب شريحة صغيرة جداً من المجتمع ولن يمثل الرغبة الشعبية بأي طريقة، خصوصاً إن لو نزلت سألت في الشارع هتجد إن في ناس كتير ماتعرفش إن في إستفتاء من الاساس.

ثالثاً: إذا تم الإلتزام بالجدول الزمني المقترح وتم إجراء إنتخابات البرلمان في موعدها، لن يكون هناك وقت كافي للقوى السياسية الغير منظمة أو اللي كانت مقموعة تحت نظام مبارك، أو اللي لم تتشكل وتظهر بعد، انهم يستجمعوا قواهم ويجهزوا مرشحين جدد لمجلس الشعب والشورى. بالتأكيد نوعية الناخبين ونسبة المشاركة هذه المرة هتختلف عن المرات السابقة، بس أنا مشكلتي مش مع الناخب، أنا مشكلتي مع المرشح. لو المرشحين من الوجوه القديمة في الساحة السياسية فهم في الغالب لا يمثلوني وهلاقي نفسي في الاخر مضطر اختار مرشح لا يمثلني حتى لا ينجح مرشح آخر فاسد أو ينتمي للنظام القديم. كثير منا منتظرين ظهور وجوه واحزاب جديدة على الساحة، لكن للاسف هذه الوجوه لن تسنح لها الفرصة حقيقية للمنافسة – ببساطة لإن مفيش وقت.

رابعاً: وده مترتب على ثالثاً  – الطريقة المقترحة لتكوين الجمعية التأسيسية لدستور جديد معتمدة ١٠٠٪ على البرلمان. وبما إن البرلمان لا يمثلني، فبالتالي الجمعية التأسيسية اللي هيختارها لا تمثلني. هذا بالإضافة لمشاكل أخرى في عملية إختيار أعضاء الجمعية التأسيسية – تامر موافي شرحها بالتفصيل على مدونته، أرجو منكوا القراءة.

خامساً: تعديل المادة ٧٥، اللي أضاف أفكار نازية للدستور كنقاء الجنسية وخلافه، يقصي كفاءات محترمة من المصريين أمثال أحمد زويل وغيره من المصريين مزدوجي الجنسية – حتى في حالة استعدادهم عن التخلي عن أي جنسيات أخرى غير المصرية.

في استطلاع رأي على موقع مجلس الوزراء، ٥٨٪ صوتوا لا للتعديلات. النسبة متقاربة جداً مع الاخذ في الاعتبار إن إستفتاء على الانترنت غير معبر عن الشارع.

يعتبر الاستفتاء صحيحاً إذا شارك فيه ١٠٪ أو أكثر من اللي لهم حق التصويت – يعني اخوان ووطني بس يضربوا الرقم ده مرتين. لذلك لو إنت زيي مقتنع بضرورة التصويت لا، لازم تنزل تشارك وتدعوا كل الناس انهم يصوتوا لا. شارك في الدعوة لرفض التعديلات وطلب دستور جديد. حط البادج بتاع الحملة على حساب الفيسبوك بتاعك والمدونة بتاعتك.