• Home
    • About

اسئلة للمجلس العسكري، والجواب للمواطن

Posted: May 23rd, 2011 | Author: mandoz | Filed under: Misc | 6,017 views | 12 Comments »

أنا مش هاطول عليكوا، أنا عندي بس كام سؤال بسيط كدة أحب أسألهم للمجلس العسكري (وأسألهلكم)  و عايزكوا أعزائي الإخوة والاخوات المواطنون تفكروا في الإجابة كويس.

  • كيف يقوم الشعب بثورة، ويتولى المجلس العسكري مهمة حماية الثورة وتلبية المطالب، ونلاقي نفسنا احنا الثوار رجعنا تاني المعارضة؟
  • ليه كل القرارات الثورية اللي المجلس العسكري أخذها جات بعد مليونية واعتصامات أو تهديد بمليونية وإعتصام؟ شفيق مشي وشرف جه ازاي؟ بمليونية. البدء في التحقيق مع مبارك وعصابته جه ازاي؟ مليونية وإعتصام.
  • المجلس العسكري يتخذ كل قراراته بدون تحاور أو نقاش مع القوى الوطنية مش عارف هل بمبدأ إن المجلس العسكري عارف فين مصلحة البلد واحنا مش عارفين ولا إيه؟ فين الشفافية؟ فين الديمقراطية؟ ازاي نتخيل إن فترة انتقالية مبنية على دكتاتورية انها تخلق من بعدها ديمقراطية؟ الاستفاء إستفتونا على 6 مواد وجدول زمني مقترح ضمنياً، والنهاية كانت إعلان دستوري فيه العشرات من المواد لم نستفتى عليها وجدول زمني ليس له علاقة بما كان يناقش قبل النتيجة، وفي النهاية يستمدون شرعيتهم من هذا الإستفتاء في حين إن الإستفتاء لم يكن على شرعية المجلس العسكري تماماً. ازاي الحوار الوطني بدأ دلوقتي، بعد إصدار قانون مباشرة الحقوق السياسية؟
  • لماذا بدأ التحقيق (وليس المحاكمة) مع الفاسدين من النظام القديم بعد شهرين من تنحي مبارك في حين إن العقل والمنطق يقول إن التأخير في التحقيق والمحاكمة معناه اعطائهم فرصة كافية لتظبيط أوراقهم؟ بدليل خروج عائشة عبد الهادي، فاروق حسني، مفيد شهاب، سوزان مبارك، فتحي سرور (في قضية واحدة) وزكريا عزمي (ودخوله تاني).  لماذا لا يعاقب عصابة مبارك على الفساد السياسي؟ عارف إن مفيش قانون للعقاب على الفساد السياسي، بس واضح إن المجلس العسكري يصدر القوانين بمنتهى السهولة بدليل قانون تجريم الإحتجاج.
  • لماذا يحاكم المدنيين محاكمات العسكرية في حين إن الأوقع هو إصلاح وتطهير وزارة العدل والنيابة والقضاء والتأكيد على سيادة القانون المدني كخطوة مهمة لإعداد الدولة للديمقراطية؟ وليه يحاكم مبارك والعادلي مدنياً و نتحاكم احنا عسكرياً؟
  • لماذا يتم فض الإعتصامات في التحرير بالقوى وإعتقال الثوار ومحاكمتهم عسكرياً (بإعتراف من المجلس العسكري – إرجع للبيانات عن معتقلين 9 مارس و9 إبريل)، وعدم البدء في الإفراج عن بعضهم غير لم ابتدى يظهر ضغط شعبي؟
  • ليه سيد مشعل لسة وزير الإنتاج الحربي بعد ما كان جزء من نظام مبارك الفاسد؟ ليه وزير الصحة أشرف حاتم لسة في منصبه بعد مطالبة النقابة باقالته وإضراب الأطباء على مستوى الجمهورية لتحقيق هذا المطلب؟
  • ليه حركة المحافظين حصلت في غياب تام للنقاش والتشاور مع القوى الوطنية، والنتيجة كانت محافظين داخلية وأمن دولة وجيش، وبقاء هؤلاء المحافظين في مناصبهم حتى الأن بالرغم من الرفض الشعبي لهم؟
  • لماذا لم يحل المجلس العسكري المجالس المحلية بالرغم إن ٩٩٪ منهم من الحزب الوطني (المنحل)؟
  • لماذا لا يقيل المجلس العسكري رؤساء العمداء الجامعات المحسوبين على النظام القديم بالرغم من الضغط الطلابي الشديد لتحقيق هذا المطلب؟  بالعكس ده الطلبة إتكهربوا لما حاولوا يعتصموا في جامعة القاهرة.
  • لماذا يعمل الامن الوطني بقيادته بظباته ببابا غنوجه بدون إشراف قضائي أو حقوقي؟
  • لماذا لم يتم تطهير الداخلية؟ لما يبقى لسة عندك نفس قيادات الداخلية اللي كانوا شغالين مع حبيب العدلي وبعضهم مقدم ضده بلاغات في قتل المتظاهرين يبقى إيه؟
  • ليه تقصير الداخلية في تأدية عملها وتلكيكها بحالتهم النفسية الصعبة و كلام من ده؟ لماذا لا يتعامل المجلس العسكري مع ظباط الشرطة بنفس الحزم اللي بيتعامل بيه مع الإضرابات والثوار؟
  • ازاي جيش – مؤهل لخوض حروب – عاجز عن السيطرة على شوية بلطجية؟ ازاي مش عارف يأمن منشأت حيوية زي مستشفى القصر العيني، أو السيطرة على أحداث امبابة، في حين إنه تمكن من إعتقال ١٨٦ شاب في مظاهرة سفارة إسرائيل لتأمينها بسرعة فائقة؟  ويعني إيه شباب تعتقل في مظاهرة، وبعضهم يتضرب بالرصاص؟ أين مكتسبات الثورة؟ أين حرية التظاهر؟
  • لماذا لا يحاكم مبارك بتهمة الخيانة العظمى على الاقل بتهمة إصدار الأوامر للقوات المسلحة والداخلية بقتل المتظاهرين؟
  • فين حرية الإعلام لما برنامج يتقطع على الهواء لإنتقاد ضيفة البرنامج بثينة كامل المجلس العسكري؟ فين حرية الرأي لما مايكل نبيل ياخد حكم حبس 3 سنين مع الشغل لكتابته تدوينة ينتقد فيها المجلس العسكري والمؤسسة العسكرية؟

أخي المواطن – موعدنا يوم ٢٧ مايو في كل ميادين مصر، لعل المجلس العسكري يجيب هذه الاسئلة

Tweet

12 Comments »


الثورة تعود للشارع يوم 27 مايو، الجزء الاول

Posted: May 17th, 2011 | Author: mandoz | Filed under: #Jan25, Politics | 8,583 views | 27 Comments »

الجزء الاول: التعليق متروك للقارئ على الاخبار التالية:

الدستور:  من أولها..ضابط الأمن الوطنى بشبرا هشم سيارة الصحفى وهرب! (تفاصيل الخبر)

المصري إليوم:  تأجيل محاكمة قيادات أمن الدقهلية في «قتل المتظاهرين» إلى 12 يونيو وإخلاء سبيلهم (تفاصيل الخبر)

المصري إليوم:  محامي المتهمين بقتل متظاهري بني سويف: «الداخلية» وكلتني للدفاع عنهم مقابل 100 ألف جنيه (تفاصيل الخبر)
المصري إليوم:  تأجيل محاكمة الضباط المتهمين بقتل شهداء السويس إلى 12 يونيو (تفاصيل الخبر)
المصري اليوم: أهالي شهداء إمبابة يحطمون قاعة المحكمة لاستمرار إخلاء سبيل الضباط المتهمين بقتل أبنائهم (تفاصيل الخبر)
الأهرام:  إخلاء سبيل فتحي سرور بكفالة 100 ألف جنيه – في قضية الكسب غير المشروع – (تفاصيل الخبر)
مصراوي بالفيديو:  سامي الشريف يامر بانهاء برنامج علي الهواء ضيفته بثينه كامل (الفيديو)

الدستور: الإفراج عن رجل الأعمال إبراهيم كامل لعدم ثبوت إدانته في أحداث البلطجة بالتحرير – تعليق مني: أحداث البلطجة دي قصدهم بيها العنف والقتل اللي حصل في فض إعتصام التحرير يوم ٩ إبريل، طب إيه اللي حصل بقى؟ – (تفاصيل الخبر)

المصري اليوم:  «المجلس العسكرى» يمد العمل بـ «الطوارئ» حتى الانتهاء من الانتخابات البرلمانية والرئاسية (تفاصيل الخبر)

الدستور:  بالمستندات.. صرف مكافأة لنجل وزير الصحة بعد تعيينه بـ9 أيام فقط! (تفاصيل الخبر)
الدستور:  بالمستندات..وزير الصحة يوقع على خطاب لحشد التصويت لمرشح الوطني بانتخابات الشعب (تفاصيل الخبر)
صحف مصرية: الشرطة ترفض رقابة القضاء (تفاصيل الخبر)
المصري اليوم:  اعتقال 7 نشطاء حاولوا عبور كوبري السلام بالإسماعيلية (تفاصيل الخبر)
المصري اليوم:  أستاذ قانون سافر «شرم» ليستجم فاستقبله «نظام مبارك» بـ«سب وسجن ومحاكمة عسكرية» (تفاصيل الخبر)
عرباوي:  إحالة علي فتوح رئيس النقابة المستقلة لعمال هيئة النقل العام لمحكمة تأديبية (تفاصيل الخبر)

شوية كدة كلام في السريع: الإضراب بقى جريمة، المحافظين داخلية وجيش، قيادة أمن الدولة لسة في أماكنهم، المجالس المحلية زي ما هيا. بقايا النظام زي ماهما في الجامعات والوزارات والمصانع والشركات وفي كل حتة.

قالك أهو الميدان موجود نبقى ننزل تاني – كام واحد إتكهرب واتضرب ولبس أحكام عسكرية أو حتى اتقتل في فض مظاهرات أو اعتصامات؟

سؤال متروك ليك: هل إنت شايف كدة الثورة نجحت؟

اللي فات ده كان تجميعة لأخبار الكام يوم اللي فاتوا بس. أدعوكوا ترجعوا كدة في الاخبار شهر ولا شهرين وتشوفوا الحياة لطيفة ازاي وجميلة (باتريق طبعاً للي مش واخد باله)

أنا مش حاسس بالتغيير، وهانزل تاني التحرير. موعدنا يوم ٢٧ مايو.

Tweet

27 Comments »


Follow mand0z on Twitter

اعمل الصح

Categories

#Jan25 Badass Misc Politics Polls Students Videos

Recent Posts

  • ١٠ أسباب أنا ليه كشمجي
  • ElSayed El-Badawy GIF Animation
  • الثورة مستمرة… بط هوين؟ عن ترشيح عمر سليمان وحالة الإحباط الثوري والاسلاميين
  • الاخوان وأبو الفتوح والملوخية
  • Stop #StopKony

Archives

  • March 2014
  • November 2012
  • April 2012
  • March 2012
  • December 2011
  • November 2011
  • October 2011
  • September 2011
  • July 2011
  • May 2011
  • April 2011
  • March 2011
  • February 2011
  • December 2010
  • November 2010
  • October 2010
Creative Commons License
This work is licensed under a Creative Commons Attribution-NonCommercial-NoDerivs 3.0 Unported License.
هذا المصنف مرخص بموجب المشاع الابداعي نسب- غير تجاري - لا اشتقاق 3.0 الاصليةالترخيص .

© Copyright 2019 | Blog @ Mandoz.com | All Rights Reserved